Здравството во 2024-та во сенка на многу нерасчистени афери

И годинава завршува без одговори и одговорност за еден од најголемите скандали во здраството – клиника за онкологија. Кој и какви злоупотреби правел на клиниката каде се лекуваат најтешко болните – истрагата на обвинителството се уште е во тек. 

Нерешени остануваат и проблемите со паркингот на скопскиот клинички центар, каде пациенти од целата земја доаѓаат да се лекуваат. Гужви, нервози и хаос е секојдневната слика во дворот на клинички. Катната гаража се уште само во најава.

Со ист статус остана и изградбата на болниците во Штип и Кичево кои требаше да станат регионални болнички центри. Кичевската болница цели 39 години се гради и никако да се изгради, а веќе осум години никако да се пушти во функција ниту новиот објект каде требаше да биде штипската болница. Веќе четири години „под клуч“ е и новиот дел од болницата во Струмица, а причината е кабел кој се уште не поставен за да може да се стави во функција на пациентите.  

Останаа и барањата и надежите на пациентите со дијабетес – безболни сензори за мерење на шеќерот во крвта да добијат сите пациенти без разлика на возраста.

Годинава ја одбележаа и серија протести на младите лекари – приватните специјализанти кои го кренаа гласот против условите за кои работат и ги потсетија здравствените власти дека е 5 до 12 за да преземат мерки. 

Протестите резултираа со најави за вработување и решавање на работниот статус од страна на министерството за здравство. 

Годинава промената на власта го врати Арбен Таравари на чело на ресорот. Укинувањето на економските директори беше еден од првите чекори на министерот, а годинава после повеќе од една деценија конечно беа ставени и нови лекови на позитивната листа. 

Таравари периодов се соочи и со низа критики од опозицијата и повици за оставка и одговорност по последните случувања на детската клиника. Министерот тврди дека здравствениот систем кој го наследиле не може да се промени преку ноќ. За следната година тврди дека фокус ќе биде ставен на пациентите но и на условите за работа на здравствените работници.

Медицинскиот кадар испиша и позитивни приказни. И годинава на скопскиот клинички центар беа извршени неколку успешни трансплантации со кои беа спасени човечки животи. Последната трансплантација беше извршена на Клиниката за ортопедија, а интервенцијата беше извршена кај 47-годишна пациентка.