На Филолошкиот факултет во Скопје беше промовиран Вториот том од романот „Пронајденото време“ кој е последен дел од романот „Во потрага по загубеното време“ на францускиот писател Марсел Пруст, а го преведе професорот д-р Ѓорѓи Марјановиќ кој почина во 2022. Промоцијата се одржа точно три години отако почина Марјановиќ, и сите средства од продажбата на книгата ќе бидат наменети за поддршка на образованието на деца без родители.
„Со објавување и промовирање на вториот том од овој роман од Марсел Пруст се заокружува еден од најобемните и најзначајните преведувачки подвизи во македонската културна средина, долгогодишниот сон на професорот Ѓорѓи Марјановиќ, кој како редок библиофил, пасиониран љубител и познавач на француската литература, со огромен ентузијазам и творечка возбуда го вложи своето време, преведувајќи го едно од најзначајните капитални прозни дела на ХХ век“, рече деканот на Филолошкиот факултет, проф. д-р Владимир Мартиновски.
Емотивен говор имаше Александар Марјановиќ, синот на професорот Ѓорѓи Марјановиќ, кој е директор на Фондацијата „Ѓорѓи Марјановиќ“.
„Оваа промоција не е само културен настан, туку таа е исполнување на сонот на мојот татко. Речиси 15 години, со тивка упорност, работеше на овој превод, далеку од јавноста, но блиску до вечните вредности на книжевноста. Во негова чест, сите средства од продажбата на книгата ќе бидат наменети за поддршка на образованието на деца без родители. Тоа е најдобриот начин да му се оддаде почит, со дело што ќе продолжи да живее и да помага“, рече Александар Марјановиќ
На промоцијата збпруваа и проф. д-р Ирина Бабамова и проф. д-р Елисавета Поповска, а модератор на настанот беше д-р Јоана Хаџи-Лега Христоска.
Промоцијата се одржа во рамките на манифестацијата „Денови на франкофонијата“, а ја организираа Катедрата за романски јазици и книжевности при Филолошкиот факултет, Универзитет „Св. Кирил и Методиј“ и Фондацијата „Ѓорѓи Марјановиќ“.
М. ЏАРОВСКА
ИЗВОР: sdk.mk
