Синдикатите на пет јавни универзитети – во Битола, Тетово, Штип, „Св.Апостол Павле“ во Охрид и „Мајка Тереза“ во Скопје денеска од 13 часот пред влезовите на универзитетите ќе одржат мирен протест затоа што не им се потпишани клективните договори.
Тие сметаат дека се игнорирани и диксирминирани од Владата и Собранието во однос на Универзитетот „Св.Кирил и Методиј“-Скопје чии вработени со потпишаниот колективен договор од овој месец добија зголемување на платите за околу 22 отсто.
Го поздравуваат спроведувањето на Колективниот договор со УКИМ, но на надлежните им порачуваaт дека „истовремено спроведуваат двојни стандарди, дискриминација и нееднаквост“. Останатите пет јавни универзитети го уживаат истиот статус, реализираат иста оштествена дејност, со иста одговорност и со непотпишување на колективниот договор неправедно се изоставени настрана од државата, се вели во соопштението на синдикатите кои нагласуваат и дека „без никаква политичка боја“ ќе протестираат мирно и обединето за „враќање на достоинството, интегритетот и правдата“.
Извор: skopskoeho.mk
