Прво интервју на Владимир Путин за западен медиум од почетокот на војната во Украина. Рускиот претседател вети дека Москва ќе се бори за своите интереси, но и дека нема желба да го прошири судирот од Украина во соседните држави, пред се Полска и Летонија, освен ако не биде нападната.
Рускиот лидер тврди дека Украинците се уште се чувствуваат како Руси, а она што се случува таму во моментов, има елементи на граѓанска војна.
„Ако навистина сакате да престанат борбите, треба да престанете да снабдувате оружје. Ќе биде готово за неколку недели. Тоа е тоа. Западот мисли дека борбите во Украина засекогаш одвоиле еден дел од рускиот народ од друг, но обединувањето ќе се случи. Технички направија се како што треба, постигнаа што сакаа, ја сменија власта. Но, од политички аспект ова е огромна грешка. Политичкиот врв требаше да види до што ќе доведе тоа. Украина ја започна војната, целта на Русија е да ја запре.“ – рече Путин.
Во интервјуто Путин, порача и дека Русија и Украина порано или подоцна ќе се договорат, нагласувајќи дека сака ситуацијата да се реши со преговори. Верува дека евентуалната промена на претседателот на САД нема да го смени односот на американската елита кон Москва, бидејќи не се работи за една личност.
„Западот почна да сфаќа дека стратешки пораз на Русија е невозможен, нека размислат што понатаму, ние сме подготвени за дијалог. Светот ќе се промени без разлика како ќе завршат настаните во Украина. Ако во американското општество преовладува идејата за доминација по секоја цена и со помош на сила, ништо нема да се промени, само ќе се влоши.“ – рече Путин.
Интервјуто на американскиот новинар Такер Карлсон со рускиот претседател предизвика вистински интерес ширум светот. Според проценките на социјалната мрежа Икс, повеќе од 30 милиони луѓе го следеа разговорот со Владимир Путин.
Извор: 24vesti.mk
