За изградба на само еден километар од автопатот Кичево – Охрид се трошеле по 9 милиони евра. Ова го покажуваат анализите на Државниот завод за ревизија (ДЗР) за работењето на Јавното претпријатие за државни патишта за 2022 година. И покрај дополнителен заем од 180 милиони долари, пролонгирањето на изградбата за уште 6 години и зголемување на вредноста на договорот за 45%, делницата Кичево – Охрид од околу 56 километри, сè уште не е изградена.
„За изградба на 1 километар од оваа патна делница, до крајот на 2022 година инвестирани се приближно 9 милиони евра. До ноември 2023 година инвестираните средства достигнуваат износ од приближно 575 милиони евра…“, се наведува од Државниот завод за ревизија.
Како главни причини за доцнењето се наведуваат недостатоците на проектот, но и задоцнета експропријациј, потребата од дислокација на надземни и подземни инфраструктурни објекти. Немало доволен број технички кадар, ниту пак доволно механизација и опрема обезбедени од изведувачот, односно подизведувачите.
„До денот на завршување на ревизијата на прва, втора и четврта подделница на делницата Кичево – Охрид се појавиле 11 нови свлечишта, а можни се и нови…“, додаваат од ДЗР.
Ревизија утврдила и неправилности во работењето на Јавното претпријатие со кое ракводи, Ејуп Рустеми, кадар на ДУИ. Најголемиот дел од материјалните средства на ЈП за државни патишта или 46% се однесуваат на документации, експропријации, градби, реконструкција и рехабилитација на патишта и надзор.
„…Oд 2015 до 2022 година направени се вложувања во проекти и недовршени градби, трошоци по основ на камати, еднократни и провизии за неповлечени средства, експропријации и други непознати трошоци, приближно од 31 милион евра за кои не е позната потребата од нивна набавка и нивната употребна вредност“, велат од ДЗР.
Во ревизија за работењето на Јавното претпријатие за државни патишта се констатира и дека парите од патната такса од регистрација на моторни возила, нецелосно се трансферираат до општините, иако законски им припаѓаат. Не се распределени приближно 58 милиони евра.
Мики Трајковски
Извор: alsat.mk
