Кои се Панче Тошковски и Ѓоко Велковски предлозите на ВМРО-ДПМНЕ кои ќе седнат на министерските столчиња на Илинденска бр 2?
Тошковски, кој е предложен за прв човек во МВР и брои денови да застане на местото на Спасовски е актуелен претседател на правната комисија на ВМРО-ДПМНЕ и долгогодишен адвокат. Политичко изненадување без беграунд во полициските структури. Можеше да се види во судниците како бранител на дел од обвинетите во случаите што ги отвори СЈО. Работел и во министерството за транспорт и врски, но бил и ангажиран како адвокат на ЕСМ во времето кога Христијан Мицкоски раководеше.
Второто министерско решение е Ѓоко Велковски. Ќе застане на чело на министерството за труд и социјална политика. Генсек на Град Скопје до септември 2022 год, а замина од функцијата порачувајки дека е разочаран од Арсовска, која пак му возврати порачувајки дека е разрешен поради корупциски скандал. Ги отфрли обвинувањата на Арсовска како клеветнички и најави тужба против градоначалничката.
Предложени се и тројца заменици министри, за финансии, за администрација и за земјоделство.
За заменик министер за финансии е предложена Елена Петрова, економист со работно искуство во Управата за јавни приходи. За заменик министер за информатичко општество и администрација е предложен Стефан Андоновски, меѓународен секретар на партијата и советник во Советот на Град Скопје. А во министерството за земјоделство, очекувано, влегува Цветан Трипуновски, кој и во претходната техничка Влада ја извршувше истата функција.
Од СДСМ денеска им порачаа дека ДПМНЕ нема програмска понуда, ниту кадровски потенцијал.
– ДПМНЕ за техничката влада понуди слаби и нестручни кадри. Дел од предложените кандидати за во техничката влада се лични пријатели на Христијан Мицкоски, дел се поранешни функционери во град Скопје а дел се кадри од времето на Груевски. – изјави Богданка Кузеска од СДСМ.
ВМРО-ДПМНЕ синоќа ги објави своите кандидати за техничката влада, веднаш по оддржувањето на седницата на Извршниот Комитет на партијата, каде беа потврдени.
Извор: 24vesti.mk
