ИСТАНБУЛ (АА) – Израел сега оди кон меѓународна изолација, тренд што во наредните денови само ќе расте, изјави денес турскиот претседател Реџеп Таип Ердоган, јавува Анадолу.
Говорејќи за новинарите по петочната молитва во Истанбул, Ердоган рече дека за време на вчерашниот телефонски разговор со американскиот претседател Џо Бајден опширно разговарале за случувањата во Газа, при што Ердоган му рекол на Бајден дека сега е време Соединетите Американски Држави (САД) да интервенираат.
Израел го бомбардира Појасот Газа од воздух и од копно, воведе опсада и изврши копнена офанзива по прекуграничниот напад на Хамас на 7 октомври.
Досега во израелските напади врз Газа загинати се најмалку 18.787 Палестинци, а 50.897 се повредени, според податоците на здравствените власти на Газа.
Според официјалните податоци, бројот на загинати Израелци во нападот на Хамас изнесува 1.200, а 135 заложници сè уште се држат од палестинските групи во Газа.
Турскиот претседател, во однос на американската продажба на борбените авиони Ф-16 на Туркије, рече дека Бајден му кажал дека има „позитивни изгледи“ за ова прашање и дека е подготвен да го претстави својот предлог пред Конгресот.
По долготрајниот процес за купување на најновиот модел на Ф-16 и комплетите за надградба за постарите модели, Ердоган предложи Туркије и САД да се движат кон одобрувањето на продажбата на Ф-16 и кандидатурата за членство на Шведска во НАТО во исто време.
Извор: www.aa.com.tr
