Ковачевски убеден дека повторно ќе биде премиер – допрва ќе се одлучува дали на избори СДСМ ќе оди заедно со ДУИ?!

СДСМ допрва ќе анализира дали ќе оди на парламентарните избори со заеднички листи со ДУИ иако претходно беше најавено дека такво решение е можно. Премиерот Ковачевски во вчерашното интервју за 360 степени, вели дека сега е многу тешко да се даде одговор дали тоа ќе биде прифатлива но, сепак не ја отфрла таквата опција.

„Тоа е дискусија која што е предмет на анализа, сепак треба да се направат добри анализи од аспект на емпириски студии, што тоа би значело. Второ, во однос на усогласеност на програми, во однос на усогласеност на вредности и трето во однос на усогласеност на кадровската понуда која што би одела во една таква ситуација. Јас опциите не ги отфрлам, меѓутоа, сепак мора да бидат анализирани“, вели Димитар Ковачевски.

Ковачевски за себе потврди дека тој ќе биде носител на првата изборна единица и е убеден дека на изборите и претседателски и парламентарни СДСМ со коалицијата ќе има сигурна победа и дека тој повторно ќе биде премиер. Тој уште и алудира на тоа дека по изборите ќе има мнозинството со кое заедно со другите коалициски партнери би обезбедил 80 гласа за усвојување на уставните измени.

„На парламентарните избори на 8 мај и на вториот круг на претседателските избори победник ќе бидат и претседателот предложен од Социјалдемократскиот сојуз на Македонија и коалицијата предводена од Социјалдемократскиот сојуз на Македонија и јас повторно ќе бидам мандатар. И тоа ќе биде и претседател на државата и Влада со кој што Република Северна Македонија ќе стане полноправна членка на Европската унија“, посочи Димитар Ковачевски.

Но како е убеден во победата Ковачевски, исто толкава убеденост има и претседателот на ВМРО-ДПМНЕ Христијан Мицкоски. И тој, во интервјуто за Шења, рече дека ќе победи и за претседателските и за парламентарните изборите и тоа со голема разлика.

„ВМРО-ДПМНЕ влегува самоуверено заедно со коалицијата дека победува на тие претседателски избори. Ние не влегуваме дефанзивно, ние влегуваме офанзивно и ние сме убедени во нашата победа. Ние сме убедени, во таа наша победа и јас сум сигурен дека ВМРО-ДПМНЕ заедно со коалицијата ќе напише историски резултат но тоа е би рекол, полесниот дел од задачата“, порача Христијан Мицкоски.

Ковачевски рече дека актуелниот претседател Стево Пендаровски е профилот за идниот претседателски кандидат од СДСМ кој како што рече треба да се залага за европската интеграција на земјава, ги исполнува барањата на граѓаните и има визија за членство во Европската унија. Мицкоски како профил на идниот кандидат не ја спомна евроинтеграцијата, туку вели дека тоа треба да биде човек со интегритет, кој ќе обединува, патриот и нешто што е поразлично од актуелниот претседател Пендаровски.