реклама
Прилепчани се изневерени, зашто по две години од мандатот на актуелниот градоначалник Борче Јовчески не е направено ништо, ниту за градот ниту за граѓаните. Наместо урбанистички ред, има хаос, повисоки давачки и нереализирани а ветени проекти, велат од СДСМ, кои за состојбата во Прилеп го обвинија ВМРО-ДПМНЕ, под чие раководство е локалната самоуправа во градот.
– Прилепчани плаќаат и до 300 отсто повисок данок на имот, за 67 проценти се зголемени сметките за комунални услуги. Ги нема ветените реконструкции на Старата прилепска чаршија, градските плоштади и амфитеатарот во Варош, нема бесплатен оброк за учениците до четврто одделение. За две години се потрошени 50 милиона евра, а не е реализиран ниту еден проект. Не се направени ветените катни гаражи или најавените кружни текови. Градот има високо ниво на загаден воздух, вели пратеникот од СДСМ, Миле Талески и тврди дека се потрошени 700 000 евра за привремено вработување на луѓе блиски до ВМРО-ДПМНЕ.
реклама
Од ВМРО-ДПМНЕ од Прилеп, пак, го тврдат спротивното, односно дека се реализираат проекти, а претходната градска власт оставила големи долгови.
– Се обновува заборавената инфраструктура, се рехабилитирани речиси 40 улици. Оваа локална власт има инвестирано над 50 милиони денари во средните и основните училишта во нашата општина, за значително подобрување на условите за работа и учење. Извршена беше реконструкција и на плоштадот Методија Андонов Ченто, на потегот од споменикот Пеце Атанасоски спрема ОУ „Кочо Рацин“ во должина од 216 метри. Моментално се работи на проект за изградба на главен доводен цевковод и изградба на пумпни станици, кој ќе реши деценискиот проблем во населеното место Канатларци. Ова се само мал дел од реализираните проекти, и покрај долгот кој СДС го остави од речиси пет милиони евра поради недомаќинското работење на минатата локална власт, изјави Билјана Кузманоска, член на ОК на ВМРО-ДПМНЕ од Прилеп.
реклама
