Германците бараат инфраструктура па да инвестираат: „Во Македонија животот е подобар отколку во Франкфурт“

Неби Изаири од Боговиње 33 години живее во Франкфурт. Има три фабрики за климатизација во Германија со 350 вработени, а од пред неколку месеци инвестираше во родното место. Фабрика за бакарни жици и цевки.

„Нашиот сон беше да стигнеме да инвестираме во нашиот роден крај и така да може децата некогаш да се вратат. Бидејќи не е целта само купи овде во Германија и да живееш овде, има живот, но животот е тежок.“, рече Неби Изаири.

Можностите за инвестирање во Македонија денеска беше претставена пред германската индустрија. Беше потенцирано дека германските компании се од голема помош за прилагодување на стандардите во македонската економија со тие на ЕУ.

„Го истакнавме високото ниво на економска соработка помеѓу Македонија и Германија како одлично искуство и за понатамошно зголемување на бројот на германски компании која е веќе повеќе од 200 компании кај нас кои имаат реализирано инвестиции и вработуваат над 22 илјади граѓани на кои редовно им се исплатуваат конкурентни плати.“, изјави Фатмир Битиќи, вицепремиер за економски прашања.

Македонија е мала но флексибилна и стабилна држава, беше пораката упатена до германската бизнис заедница.

„Македонија е земја која располага со човечки потенцијал. Значи имаме луѓе кои се вредни, трудољубиви, луѓе кои сакаат да работат меѓутоа тие луѓе треба да се платат. Тоа беше нашата порака која ја пренесовме на инвеститорите денеска. И она што ме радува од вчера и денеска се потврди дека не е проблем да се обезбедат поголеми плати за нашите работници, сите оние стравувања кои се појавија во политичките деловните кругови дека растот на платите и нашето инсистирање за раст на платите ќе доведе до забавување на процесот на инвестирање, се покажува дека не е така.“, рече Јован Деспотовски, директор на ТИРЗ.

„Можам да потврдам дека имавме голем број на мошне интересни разговори. Компаниите поставуваа конкретни прашања. Со каква работна сила располага Македонија, какви квалификации имаат работноспособните кадри, каква државна помош дава државата на потенцијалните инвеститори, навистина дојдовме до заклучоци, со конкретни прашања и конкретен интерес за соработка на нашиот пазар.“, вели Антје Ванделт, директор на АКХ Северна Македонија.

За германските инвеститори најголем интерес беше прашањето за поврзувањето со пристаништата во Драч и Солун, како и коридорите за набавка на суровина. Од вицепремиерот беа посочени проектите за коридорите 8 и 10, крајниот рок како и Паневропскиот кордиор.

„За производство носиме од Бугарија, таму нема автопат. Тоа е тешко. Каде што има автопати таму има и индустриски зони, може да се инвестира, каде што нема не може ниту да се инвестира. Се поскапо е и поскапо.“, изјави Неби Изаири.

За крај пораката од Изаири и копнежот да се врати во родната земја.

„Овде да живееш 10 години, но во Македонија е многу подобро. Ќе живееш и 150 години. Таму е добар животот…“, рече Изаири.

Известува од Франкфурт, Германија
Јовица Пауноски