СКОПЈЕ (АА) – Во турски Киркпинар, во северозападната област Едрене се одржува 664-то издание на Историскиот фестивал на пеливанството, јавува Анадолу.
Традиционалниот натпревар започна вчера во Сарајичи, каде што 36 пеливани (борачи) учествуваа во категоријата *Миник-1* (најмлади). Вкупно 762 борачи, меѓу кои 40 главни борачи (Башпеливани), ќе си ги одмерат силите во текот на викендот.
Оваа година, натпреварувачите се соочуваат не само едни со други, туку и со предизвикувачките временски услови. Високата влажност од блиската река Тунџа во Едрене, во комбинација со високите температури, додава уште еден слој тежина на физички напорниот спорт.
Со оглед на тоа што Едрене доживува интензивна летна жега, борачите – веќе премачкани со маслиново масло – ќе го почувствуваат влијанието на температурите уште повеќе поради нивниот напор и отворената околина на борилиштето.
Метеоролозите предвидуваат максимални температури кои денес во подрачјето ќе достигнат 38°C за време на финалето на главните борачи (Башпеливани), и 37°C во текот на утрешниот ден.
Според турското Министерство за култура и туризам, фестивалот во Киркпинар ги влече своите корени од 14. век од Румелија, балкански регион под раното Осмалиско Царство. Признаен како еден од најстарите фестивали на борење во светот, на него учествуваат натпреварувачи намачкани со маслиново масло, облечени во традиционални кожни панталони (киспет) врзани со јаже.
Фестивалот, кој се наоѓа на листата на нематеријално културно наследство на УНЕСКО, привлекува илјадници посетители секоја година, славејќи ја силата, издржливоста и турската спортска традиција.
Финалето за престижната титула Башпеливан се одржува денес, а победникот ќе го освои посакуваниот „Алтин кемер“ (Златен појас).
Извор: Anadolu Agency (AA)
