ИСТАНБУЛ (АА) – Историскиот оркестар Мехтер, симбол на отоманското воено и музичко наследство, ги започна своите традиционални летни настапи пред палатата Долмабахче во организација на Претседателството за национални палати на Република Турција, јавува Анадолу.
Првиот настап се одржа денес пред „Портата на ризницата“ на палатата и привлече големо внимание кај домашните и странските туристи, кои со воодушевување ги слушаа звуците на старата отоманска воена музика.
Оркестарот Мехтер, кој делува во рамки на Министерството за национална одбрана, настапи во автентични костими, изведувајќи композиции со традиционални инструменти како зурли, тапани и ѕвона, со што го пренесоа духот на империјалното минато.
Оркестарот Мехтер датира од 11 век и во времето на Отоманската Империја им служел на војниците како извор на морал и симбол на воената моќ и победа. Денес, тој претставува вредно културно наследство што продолжува да буди чувство на национална гордост и историско сеќавање.
Во текот на летниот период, оркестарот ќе настапува на три историски локации во Истанбул: во палатата Долмабахче секој вторник, во палатата Топкапи (влезот Бабусаде) секоја среда и во палатата Јилдиз (првиот двор) секој четврток.
Сите настапи започнуваат во 11:00 часот и се отворени за јавноста.
Извор: Anadolu Agency (AA)
