Опозициската СДСМ нема да го поддржи предлогот Трајко Славески да биде иден гувернер на Народната банка. Координаторот на пратеничката група Оливер Спасовски образложи дека ова е партиски а не избор на експерт, што за нив е неприфатливо да биде на таква важна функција. Не може човек кој велеше дека 9 илјади денари минимална плата е голема и кој беше противник на економските политики да биде гувернер, рече Спасовски.
-Ние нема да го поддржиме предлогот за гувернер заради тоа што сметаме дека изборот е исклучиво теснопартиски не е избор кој што ќе понуди експерт на позицијата гувернер на Народната банка што било, би рекол, традиција во изминатите години. Од претседателот на Совет на Град Скопје доаѓа како гувернер на Народната банка, изјави Оливер Спасовски, координатор на СДСМ.
Премиерот Мицкоски, пак, рече дека пратеничката група на ВМРО-ДПМНЕ ќе гласа за изборот на Славески пак вели дека кандидатот го предлага претседателот на државата и пратеничката група на ВМРО-ДПМНЕ ќе даде поддршка. Предлогот Славески да биде избран за гувернер веќе е во собраниска процедура, но за сега не се знае кога ќе биде закажана седницата. За неговиот избор во Собранието потребно е просто мнозинство од 61 глас, кои владејачкото мнозинство ги има во законодавниот дом.
-Тоа е одлука на претседателот на државата, не е одлука на Владата. Согласно Устав претседателката на државата го поднесува тој предлог, така што немам што да коментирам. Предлогот ќе ја добие поддршката од пратеничката група на ВМРО-ДПМНЕ, изјави премиерот Христијан Мицкоски.
Побаравме став и од Европскиот фронт дали тие ќе го поддржат Славески за гувернер, но одговор не добивме. Славески кој е актуелен претседател на Советот на Град Скопје треба да ја замени досегашната гувернерка Анита Ангеловска Бежовска, а покрај неа кандидат за позицијата прв човек на централната банка беше и Зоран Ставревски.
ИЗВОР: ТВ 21
