Сто години љубов кон фудбалот на едно место. Велес синоќа ја доби својата прва монографија посветена на фудбалот „100 години фудбал во Велес“, авторско дело на Ѓорѓи Минов и неговиот истражувачки тим. Книгата, на повеќе од 200 страници во боја, го опфаќа целиот век на фудбалска историја во градот, од првите натпревари во 1919 година, до современите генерации.
Монографијата е збогатена со ретки фотографии од фудбалски легенди од Велес, но и од цела Македонија, како и со автентични исечоци од весници, кои авторот грижливо ги собирал повеќе од две децении.
Проектот го поддржа поранешниот фудбалер, а сега прв човек на фудбалскиот Синдикат Панче Ќумбев, кој се јавува како уредник на изданието. Според него, целта била да се остави трага за идните генерации, за да знаат дека Велес отсекогаш живеел со фудбалот.
Велешката и македонска фудбалска легенда Мирсад Јонуз со гордост се потсети на првите голмански чекори во Борец.
За ракометната икона Пепи Манасков оваа монографија е богатство за градот и за целата држава. Емоции предизвика и обраќањето на некогашниот фудбалски ас на Вардар и екс тренер на Борец, Кочо Димитровски, кој нагласи дека вакви проекти ја чуваат живата спортска меморија на Македонија.
Во создавањето на монографијата учествуваа спортските ветерани Томислав Шескокалов, Ристо Сугарев и Димитрија Андонов и уште многу други. Монографијата „100 години фудбал во Велес“ е објавена во 300 примероци, сведоштво за градот што отсекогаш знаел како се игра и како се сака фудбалот.
Извор: 24vesti.mk
