Продолжуваат протестите во Србија. Од утрово блокада на една од најважните сообраници во Белград. Во следните 24 часа затворен ќе биде патот кај населбата Автокоманда а единствено ќе се пропуштаат амбулантните возила.
Блокадата почна во 10 часот а студентите ги повикаа граѓаните да им се придружат и уште еднаш да испратат порака до власта. Протестот следи по општиот штрајк кој се одржа во петокот, а на кој покрај студентите се приклучја и синдикатите, професори, лекари, адвокати, земјоделци.
„Со години излегуваме на протести но досега ништо не се промени. Се надевам дека младите ќе успеат во своите намери а ние сме тука да им го чуваме грбот.“ – Зоран Шаорац.
„Мириса на промена и се надевам дека тоа ќе се случи бидејќќи тоа навистина и треба на оваа држава. Нема демократија и во оваа држава не се живее туку се преживува.“ – Анџела Машовиќ.
„Донесовме кебиња и храна и планираме тука да поминеме 24 часа.“ – студентка на факултетот за медиуми.
Во меѓувреме, протестите прераснаа во општо незадоволство од работата на владата и барање за поголема оговорност од властите. Зад барањата на студентите застана и академската заедница како и голем број на спортисти и уметници.
„Ова е ваше време и имате право да го објасните за некоја подобра иднина што ви припаѓа и немам што друго да ви кажам, освен да ве поддржувам со целото мое срце. Не само јас, туку и сите нормални луѓе.“ – Раде Шербеџија.
За попладнево пак обраќање до јавноста најави Александар Вучиќ. Реакцијата на српскиот претседател следи по упадот на студентиет кои се обиделе да ја прекинат Академијата Свети Сава на Матица Српска.
„Некои луѓе мислат дека имаат право да ни ги уништуваат историјата, традицијата, културата. Наше е да одговориме на тоа со мир, трпение и сериозен пристап, на поинаков начин да се воспитуваме и менуваме и себеси и нашите деца, и во иднина тоа никогаш да не ни се повтори. Ќе се спротивставиме со сите дозволени и демократски политички средства. За нас е важно на мирен и трпелив начин да покажуваме однос кон политичките противници, да ја зачуваме стабилноста и да покажеме почит кон оние кои поинаку мислат.“ – Александар Вучиќ претседател на Србија.
Денешните блокиди во Белград се продолжение на повеќемесечните студентски протести, кои почнаа по трагедијата во Нови Сад, кога загинаа 15 луѓе во уривањето на настрешницата на железничката станица.
Извор: 24vesti.mk
