За Њујорк тајмс ова е впечатливо јавно отфрлање на изјавата на Залужниј „кое сигнализира појава на поделби меѓу воените и цивилните лидери во проблематичен период за Украина.“
Заменикот шеф на кабинет на Зеленски, Ихор Жовка, на националната украинска телевизија порача дека тврдењата на Залужниј ја „олеснуваат работата на агресорот“ и дека коментарите предизвикуваат паника меѓу западните сојузници на Украина.
Во исто време Зеленски коментирајќи го интервјуто на генералот за Економист, изјавува „минува време, луѓето се уморни, без разлика на нивниот статус, и ова е разбирливо“ дополнувајќи „но војната не е во безизлезна ситуација, сакам ова уште еднаш да го нагласам.“
Критиките од властите во Киев следуваат само еден ден откако по наредба на претседателот беше сменет заменикот на Залужниј одговорен за специјални операции. Не е познато дали генералот или командата на украинските сили била свесна дека се планирала смената.
Тајмс коментира дека несогласувањето меѓу генералот и претседателот се случуваат во време кога Украина има проблем да покаже некаков успех на военото поле, и дека минималните напредоци се добиени по цена на големи загуби на војска и опрема.
Вон фронтот паниката кај украинското раководство е дека глобалното внимение е свртено кон конфликтот меѓу Израел и Хамас, наместо кон војната против Русија. Дури и пред воопшто во Израел да се случи 7 октомври, меѓу Западот и Украина имаше тивок судир за тоа кој е виновен за слабите резултати на контраофанзивата. За Западот, Украина згрешила што премногу ги растегнала своите сили по фронтот, за Укриана, Западот задоцнил со испраќање на неопходното оружје.
Иако повеќе од една година се шпекулира за судир меѓу Зеленски и Залужниј, ова е прв пат тоа јавно да биде покажано. Генералот до сега нема јавно реагирано ни на коментарите на владата, ни на отпуштањето на првиот човек за специјални операции.
Залужниј за Економист објаснува, поткрепено со есеј, дека дроновите и други технологии го направиле невозможно напредувањето на механизираните единици, и дека двете страни моментално се заглавени без можност за дополнителен напредок. Тој објаснува дека и Русија е заглавена во истиот проблем и секој напредок е по неверојатна човечка цена.
ИЗВОР: off.net.mk
