Оризопроизводителите од населените места во општина Чешиново-Облешево излегоа на протест и со земјоделска механизација ја блокираа едната коловозна лента од магистралниот пат Кочани – Штип за да го изразат незадолството од актуелните политики на почетокот на сеидбената сезона.
На протестот земјоделците изнесоа три барања за кои очекуваат брзо исполнување од надлежните институции. Министерот за земјоделство Трипуновски се сретна со нив и ги информирал дека се прават максимални напори за исполнување на планот за наводнување, при што ќе се води контрола за распределбата и рационалното користење на водата. За субвенциите рекол дека поддршката се реализира според планот и дека парите земјоделците ќе ги добијат на нивните сметки токму кога најмногу им се потребни.
„Првото барање е корекција на предлог-планот за наводнување на територијата на општина Чешиново-Облешево, второто барање е корекција во исплатата на субвенцијата од 6 денари за килограм, при што тоа да биде за целата предадена арпа, а не за 800 килограми арпа по пријавена површина. Така беше договорот со надлежните органи во државата. Третото барање е што побргу да почне откупот за стоковите резерви“, вели Стојче Ташовски.
„Земјоделците од општината Чешиново-Облешево бараат прием крај премиерот, премиерот да ги разбере овие наши работи. Јас лично, лани оризот го дадов по цена 39 денари, а сега го давам 26 денари. 13 илјади евра сум во загуба. За што да работам јас“, вели Коце Ангелов.
ИЗВОР: ТВ 21
