За Петровска техничката влада е неопходна до влез во ЕУ

Во вешерашното издание на емисијата „Топ Тема“ на телевизија Телма, пратениците Антонио Милошоски од ВМРО-ДПМНЕ и Славјанка Петровска од СДСМ ги спротивставија своите ставови околу функционалноста на институциите, потребата од техничка влада и предложените измени во
Изборниот законик.

Пратеничката на СДСМ, Славјанка Петровска, ја нагласи важноста на парламентарниот надзор, особено врз безбедносните служби, посочувајќи дека во минатото честопати биле соочувани со изговори при обидите да извршат контрола.

Таа истакна дека државните институции и економијата се соочуваат со предизвици не само за време на техничка влада, туку и за време на локални избори поради рестрикциите во Изборниот законик.

Во однос на т.н. „Пржинска влада“, Петровска потсети дека таа беше воспоставена со заедничка согласност на сите политички чинители.

„Нашиот став е дека техничката влада треба да постои до влезот на Македонија во Европската Унија, онака како што начелно беше побарано и договорено во 2018 година.

Обидот за нејзино укинување сега, преку скратена постапка, само ја потврдува тезата дека опозицијата се премислува според своите моментални потреби“, изјави Петровска, критикувајќи ја и нетранспарентноста на дел од министрите при одговарање на пратенички прашања.

Од друга страна, пратеникот на ВМРО-ДПМНЕ, Антонио Милошоски, изрази загриженост поради најавите на СДСМ за блокирање на измените во Изборниот законик преку „филибастеринг“ (долготрајни говори). Тој појасни дека предложените измени во голема мера ги инкорпорираат препораките на ОБСЕ/ОДИХР, кои имаат за цел да ја олеснат работата на Државната изборна комисија (ДИК).

„Загрижува најавата дека СДСМ планира да го блокира законот кој содржи европски препораки за поефикасни избори. Како претседател на Комисијата за европски прашања, нема да дозволам злоупотреба на европското знаменце за закони кои не се директно поврзани со усогласувањето со правото на ЕУ, само за да се избегне дебата“, истакна Милошоски.
Тој додаде дека инсистирањето на СДСМ за задржување на техничката влада е всушност обид на партиското раководство да најде изговор за претстојните изборни резултати. „Очигледно е дека СДСМ бара алиби за следниот изборен пораз преку одржување на овој модел на влада“, заклучи Милошоски.