Министерот за економија Бесар Дурмиши и заменик-министерот Марјан Ристески информираа дека се разгледува можноста некои дејности, како маркетите, фризерите и козметичарите, повторно да работат во недела. Сепак, синдикатите се против, поради што се бара компромисно решение.
„Не се дискутира за укинување на неделата како неработен ден, туку за дозвола за работа на одредени дејности со услов работниците да добијат двојна или тројна плата,“ изјави Дурмиши, додавајќи дека разговорите ќе продолжат за да се постигне прифатливо решение.
Министерот ги обвини производителите, дистрибутерите и маркетите за неодамнешните поскапувања на основните производи, предупредувајќи дека, доколку злоупотребите продолжат, ќе следат построги мерки.
„Одлуката за замрзнување на цените е веќе подготвена. Ако повторно има неоправдано поскапување, таа веднаш ќе биде донесена,“ изјави Дурмиши.
Законот за нефер трговија стартува од 1 јануари, но ќе претрпи технички измени поради забелешки за трошоците за маркетинг и враќањето на производите со краток рок.
Надлежните уверуваат дека со новиот закон повеќе нема да има казни, а Комисијата за заштита на конкуренцијата е целосно подготвена да реагира.
Изминатите денови, цените на производи кои не беа дел од Новогодишната кошница пораснаа до 30%, што ја зголеми инфлацијата на 4,3% во ноември. Во моментов, цените се стабилизирани, но Владата внимателно следи како ќе се однесуваат трговците и производителите во наредниот период.
ИЗВОР: racin.mk
