АНКАРА (АА) – Агенцијата на Оебдинетите нации за палестински бегалци (УНРВА) денес изрази загриженост поради зголеменото ниво на глад во Појасот Газа, јавува Анадолу.
„Во Газа гладот се зголемува. Од глад луѓето се онесвестуваат на улиците“, се вели во соопштението на агенцијата за X.
„Сегашниот систем за дистрибуција на помош ги понижи и дехуманизира гладните и исплашените, повредените и исцрпените семејства.“
УНРВА нагласи дека „ниедно лице, никаде, не треба да биде принудено да избира помеѓу ризикување на својот живот и прехранување на своето семејство“.
Агенцијата, исто така, потсети на својата способност да обезбеди ефикасна хуманитарна помош кога ѝ е даден пристап.
„За време на прекинот на огнот, ОН, вклучително и УНРВА, докажаа дека можат безбедно и во голем обем да испорачаат помош што спасува животи низ Појасот Газа“, се вели во соопштението.
УНРВА ги повика сите страни да дозволат итен хуманитарен пристап. „Имаме системи, експертиза и волја. Она што ни треба е пристап. Прекинете ја опсадата. Дозволете ни да си ја завршиме нашата работа.“
Неколку групи за човекови права, вклучително и Амнести интернешнл, го обвинија Израел дека продолжува да го користи гладувањето како оружје во војната против цивилите во Појасот Газа, како дел од поширокиот напор за „нанесување геноцид“ врз Палестинците.
И покрај меѓународните повици за прекин на огнот, израелската армија уби повеќе од 57.000 Палестинци во смртоносната офанзива во Појасот Газа од октомври 2023 година.
Минатиот ноември Меѓународниот кривичен суд издаде налози за апсење на израелскиот премиер Бенјамин Нетанјаху и неговиот поранешен министер за одбрана Јоав Галант за воени злосторства и злосторства против човештвото во Газа.
Израел, исто така, се соочува со случај за геноцид пред Меѓународниот суд на правдата поради својата војна против енклавата.
Извор: Anadolu Agency (AA)
