САРАЕВО (АА) – Министерот за индустрија и технологија на Република Туркије, Мехмет Фатих Каџир, во своето обраќање на 13. Сараево бизнис-форум порача дека унапредувањето на соработката во областа на индустријата и технологијата, во сите области на економијата, може само да донесе мир, стабилност и просперитет за сите. Тој порача дека Туркије секогаш ќе го поддржува економскиот развој на целиот регион на Балканот, јавува Анадолу.
Сараево бизнис-форумот (СБФ), тринаесетти по ред состанок на инвеститори, деловни луѓе и економски експерти, голем број претставници на држави и влади од регионот и светот, официјално започна денес во главниот град на Босна и Херцеговина.
Турскиот министер Каџир на самиот почеток на своето обраќање истакна дека Сараево бизнис-форумот дава одлична можност да се разговара како да се унапреди регионалната економска соработка на Балканот.
„Како министер за индустрија и технологија, сакам да нагласам дека Туркије е целосно посветена на споделувањето и користењето на нашите искуства за поттикнување на технолошкиот напредок, дигиталниот и индустрискиот раст и просперитетот насекаде на Балканот. Свесни сме дека развојот и стабилноста на Балканот мора да одат заедно со економскиот прогрес“, нагласи Каџир.
Осврнувајќи се и на трговските односи меѓу Туркије и Босна и Херцеговина, Каџир потсети дека размената на стоки минатата година надминала 900 милиони долари и дека до крајот на оваа година очекува таа да надмине една милијарда долари.
„Секогаш ќе го поддржуваме економскиот развој на Босна и Херцеговина и на целиот регион на Балканот“, подвлече Каџир.
Посебно го нагласи значењето на унапредувањето на соработката во областа на индустријата и технологијата.
„На сите меѓународни платформи истакнуваме дека унапредувањето на соработката во областа на индустријата и технологијата, во сите области на економијата, само за сите би донело мир, стабилност и просперитет. Со оглед на моментната геополитичка и економска клима, лично мислам дека тајмингот не може да биде подобар да се работи и гласно да се зборува за тоа“, порача Каџир.
Говорејќи за активностите што ги спроведуваат во Туркије, Каџир рече дека Туркије дава стимулации за инвестиции во обновливи извори на енергија, кои денес сочинуваат 55 отсто од вкупниот инсталиран капацитет.
„Ние не само што користиме, туку имаме и производи од зелената енергија. Денес Туркије е на прво место во производството на соларни панели во Европа. Подготвени сме и заинтересирани за соработка во областа на зелената енергија со сите земји од Балканот. Патот до зелениот раст нуди значителни изгледи за Туркије и балканските земји за уште поблиска соработка во иднина“, рече Каџир.
Тој додаде дека сличен прозорец на можности постои и во областа на дигитализацијата и иновациите.
„Технолошкиот развој е клуч за иднината, за сите. Свесни сме дека најлесен и најодржлив начин да се направи тоа е да се забрза, продлабочи и прошири соработката меѓу нашите земји, без никого да изоставиме. Се надевам дека Форумот ќе нѐ поттикне сите кон реализација на нови проекти за иднината“, заклучи Каџир.
Во рамките на посетата на Босна и Херцеговина, министерот Каџир денес во Сараево ќе оствари низа средби.
Годинашниот Сараево бизнис-форум обединува истакнати претставници на деловната заедница, инвеститори, експерти и владини претставници за да разговараат за клучни економски прашања и да ги истражат можностите за инвестирање и заедничка соработка.
Извор: Anadolu Agency (AA)
