ИСТАНБУЛ (АА) – Туркије длабоко жали поради нападот во Њу Орлеанс и се надева дека мотивот зад нападот во американската сојузна држава Луизијана наскоро ќе биде откриен, јавува Анадолу.
„Длабоко сме тажни поради нападот што се случи во Њу Орлеанс, САД“, се вели во соопштението на Министерството за надворешни работи на Туркије.
Во соопштението се изразува надеж дека мотивот за нападот ќе се утврди „што е можно поскоро“ и се изразува сочувство до загинатите, а на повредените им се посакува брзо закрепнување.
„Изразуваме сочувство до семејствата и пријателите на оние кои ги загубија животите, а на ранетите им посакуваме брзо закрепнување.
Се надеваме дека мотивот за нападот ќе биде откриен што е можно поскоро и дека оние кои би можеле да бидат одговорни ќе одговараат пред правдата“, се заклучува.
Најмалку 10 лица загинаа, а 35 се повредени кога маж со камион влета во толпа луѓе кои ја прославувале Новата година во популарниот француски кварт во Њу Орлеанс, соопштија денес локалните власти.
Инцидентот се случи околу 3:15 часот по локално време на раскрсницата на улиците Канал и Бурбон, се вели во соопштението објавено на веб-страницата на градот. Повредените се пренесени во пет блиски болници.
Историската област е популарна кај туристите и е место за прославување на големите празници, особено новогодишната ноќ.
Повеќе медиуми објавија дека осомничениот е мртов, наведувајќи анонимни извори од полицијата.
Градоначалничката на Њу Орлеанс, ЛаТоја Кантрел, го нарече фаталниот инцидент за време на прес-конференцијата „терористички напад“.
Официјален претставник на ФБИ, кој ги информираше новинарите заедно со Кантрел, рече дека е пронајдена најмалку една импровизирана експлозивна направа и дека агентите се обидуваат да утврдат дали станува збор за „реална направа или не“.
Напаѓачот отворил оган и од своето возило откако удрил во толпата, застрелувајќи двајца полицајци, соопшти полицијата, додавајќи дека тие се во стабилна состојба.
Извор: Anadolu Agency (AA)
