ИСТАНБУЛ (АА) – Терористичката организација ДЕАШ ја презеде одговорноста за нападите во Керман, Иран, во кои загинаа 84 лица, јавува Анадолу.
Во соопштението објавено на профилите на Телеграм поврзани со терористичката организација, се наведува дека терористичките напади во Иран се „самоубиствен чин“.
Се додава дека „над 300 мртви и повредени биле цел на нападот што го извршија двајца бомбаши самоубијци во близина на гробот на иранскиот генерал Касем Сулејмани во Керман.“
Најмалку две силни експлозии одекнаа завчера на патот што води до гробот на највисокиот ирански генерал Касем Сулејмани, каде што се одржуваше комеморација по повод четвртата годишнина од убиството на командантот на елитната единица на иранската Револуционерна гарда, кој беше убиен во американски напад со дрон во Багдад, во јануари 2020 година.
На одбележување на годишнината се собраа илјадници луѓе.
Според најновите податоци, во нападите загинаа 84 лица, а повредени се 284 лица.
Извор: www.aa.com.tr
