реклама
Продолжува битката меѓу албанските политички партии за испразнетото место во Државната изборна комисија. Претседателот на Собранието, Талат Џафери, до петте опозициски политички партии го испратил извештајот од Комисијата за избори и именувања, преку кој побарал писмено да ги предложат своите кандидати за членство во ДИК. Ова барање е испратено до Демократското движење, Народното движење, Движењето Беса, Европската демократска партија и Алтернатива. Но, според опозицијата, ова известување требало да биде испратено само до Алтернатива и Движењето Беса, бидејќи како што велат, само овие две партии учествувале на последните парламентарни избори.
„Според она што се бараше на хартија, но и согласно обврската дефинирана со Изборниот законик, го известивме претседателот на Собранието дека наш кандидат за член на ДИК е г. Абдуш Демири, додека јас како координатор испратив писмо до претседателот Собранието, во кое ги потсетив дека единствени опозициски партии според дефиницијата од член 2 став 10 од Изборниот законик се Алтернатива и Движење Беса, како партии произлезени од минатите парламентарни избори“, порача Сафије Садики Шаини.
реклама
Оваа постапка на Џафери, според Фадиљ Зендели од Движење Беса, е обид до крајот можеби ДИК да остане со само шест члена. Се сомнева дека мнозинските партии сакаат да се наметнат преку опозициските партии.
„Иако ние политичарите обично не ги откриваме конечните намери, но тој несвесно веројатно ја открива намерата ДИК да остане некомплетна, албанската опозиција да не биде застапена во ДИК. Но, во конкретниот случај драстично го прекршува Изборниот законик. Го прекршува Изборниот законик целосно за да се создаде забуна во овој процес, кандидати кои се од мнозинството, сега преку некои партии кои не ги исполнуваат условите, да се бидат предложени од нив во процесот на избори на пленарна седница“, вели Фадиљ Зендели.
реклама
Инаку, кандидат на Европскиот сојуз за промени е Абдуш Демири, додека кандидат на Европската демократска партија е Зуљфи Адили.
„Го прифативме повикот и одговоривме со предлог. Наш кандидат е Зуљфи Адили“, вели Арјанит Хоџа.
реклама
Народното движење нема кандидат, но нема да поддржат ниту еден од останатите кандидати.
„Народното движење доби барање да предложи член за ДИК, но ние нема да поддржиме ниту еден од предложените кандидати за член на ДИК“, вели Скендер Реџепи.
Инаку, на последната седница на Комисијата за избори и именувања, првично беше одбиена кандидатурата на Абдуш Демири, но потоа заедно со Демири поминаа сите кандидати. Следен чекор е кандидатите да бидат изгласани во Собранието на пленарна седница. Кандидатот кој ќе седне на испразнетото место во ДИК мора да обезбеди 80 гласа во Собранието.
реклама
