НОВИ ПАЗАР (АА)
Според процените на организаторот и од полициските извори на Нови Пазар, на синоќешниот протест и марш „За слобода, за мир, за Палестина“, во организација на здружението на жени „Ен-Ниса“, учествувале меѓу 15 и 20 илјади луѓе, известува Анадолу.
Претседателката на здружението „Ен-Ниса“, Азра Шемсовиќ, наведе дека собирот е организиран од потребата да му се покаже на светот дека иако е храброст да се застане на страната на доброто, на страната на вистината и на страната на правдата, може да каже дека има чест што граѓаните на Нови Пазар се храбри, поддржувачи на вистината и сочувствителни луѓе. Таа наведе дека толкав број луѓе се собрале само за да ѝ дадат поддршка на Газа, поддршка на Палестина, на Палестинците муслимани, на Палестинците христијани, да им дадат поддршка на живите и гласно да се каже дека убиените деца и цивили никогаш нема да бидат заборавени.
„Овој протест и марш што ги организиравме се само одраз на нашата тага за Газа. Едноставно не може само да седиме и да гледаме како Израел врши геноцид над недолжните цивили, жени, мажи и деца во Газа. Доколку веќе не можеме ништо друго, можеме барем да излеземе на улица и да ги покажеме незадоволството, грижата и желбата очигледниот геноцид да запре. Имам две деца и откога Израел тргна брутално да убива деца, бебиња, кога само ќе помислам дека моите деца не се безбедни само една ноќ, ми се крши срцето. Мислам дека сите оние што дојдоа вечерва во еден момент се ставиле во таа ситуација и ја почувствувале болката во своите гради. Знаете, ние сме народ што преживеа геноцид и можеби поради тоа дополнително чувствуваме толкава тага за народот што во моментов е во најтешка ситуација во светот. Со протестот сакаме да упатиме порака до сите меѓународни организации да не молчат пред очигледниот геноцид на Израел над Газа, да го запрат и да овозможат хумани услови за ранетите, старите лица, жените и децата. Да се укине окупацијата на Газа што трае со децении наназад. Сакаме мир во Газа, мир во Палестина и, конечно, ако даде Господ, и ние да го посетиме Кудс (Ерусалим) и да уживаме во убавините на Палестина која треба да им остане на Палестинците“, рече Шемсовиќ.
На собирот е упатена и дова (молитва) за народот на Палестина, емитувани се пораки за поддршка на Палестина, а на плоштадот биле изложени и потресни фотографии од разорувањата и убиствата во Газа изработени од фотографот Мотаз Азаиза.
