КУДС/ЕРУСАЛИМ (АА) – Израел мора да ја зголеми хуманитарната помош за цивилите во Газа бидејќи помошта што влегува во енклавата задоволува само 10 отсто од нивните потреби, јавуваат израелските медиуми, пренесува Анадолу.
Израелскиот весник „Хаарец“ пишува: „Половина од населението во Газа е во состојба на тежок или екстремен глад, а 90 отсто од над два милиони жители на Газа често поминуваат цел ден без храна.“
„190 камиони кои влегуваат во Газа дневно со дозвола на Израел обезбедуваат само околу 10 отсто од потребите на жителите на Газа“, се додава.
„Израелските медиуми во голема мера го кријат од јавноста обемот на деструкцијата, смртта и хуманитарната катастрофа во Појасот Газа како резултат на војната“, пишува весникот.
Жителите на Газа се борат со катастрофални хуманитарни и здравствени услови, бидејќи речиси 1,4 милиони од 2,3 милиони луѓе се раселени од своите домови.
Израел го ограничи пристапот до храна, вода, лекови и електрична енергија поради интензивните бомбардирања.
Помошта што влегува во Појасот Газа не ги задоволува потребите на населението, со оглед на строгата блокада што Израел ја наметна врз палестинската територија од 2006 година.
Конференцијата на Обединетите нации за трговија и развој (UNCTAD) на 26 октомври соопшти дека долгогодишната израелска блокада на Газа остави 80 отсто од Палестинците во Газа зависни од меѓународната помош.
Бројот на загинати Палестинци во нападите на израелската војска врз Газа од 7 октомври се искачи на 21.822, додека бројот на ранети на 56.451, соопшти Министерството за здравство на енклавата.
Израел започна немилосрдни воздушни и копнени напади врз Појасот Газа по прекуграничниот напад на палестинската група на отпорот, Хамас, на 7 октомври.
Властите тврдат дека во нападите на Хамас загинале околу 1.200 Израелци.
