Женската јуниорска репрезентација на Македонија со убедлив пораз го почна настапот на Европското првенство Б-дивизија што од денеска се одржува во Литванија.
Нашите млади кошаркарки загубија од Романија со 45-87 во меч во кој одиграа квалитетно само во првата четвртина. Тие десет минути ги добија со 16-13, но потоа почна доминацијата на противникот.
Во воведниот период Македонија имаше водство и од 10 разлика (16-6), но по три минути игра во втората четвртина Романија израмни (20-20), а нешто подоцна и дојде во водство со 22-20. На две минути пред крајот на полувремето, противничките веќе имаа двоцифрена предност (33-23). На голем одмор беше 37-27, но сите дилеми беа решени во третиот период кој ѝ припадна на Романија со огромни 25-9.
Романската репрезентација доминираше во речиси сите сегменти, оствари 65 скока, наспроти 38 на Македонија, погоди девет тројки наспроти само две на нашиот тим (Мариновска и Алексова), а нашите кошаркарки имаа дури 30 загубени топки, 13 повеќе од противникот.
Ања Начевска беше убедливо најдобра во редовите на македонската селекција со 11 поени и 13 скока, но даллеку од доволно да избори добар резултат. Утре нашата репрезентација ја очекува дуел против Германија, од 17 часот.
Извор: kurir.mk
