Актерката Анџела Басет и 97-годишниот писател и режисер Мел Брукс се меѓу четворицата добитници на почесните Оскари од американската Академија за филмска уметност и наука. На синоќешното свечено доделување во Холивуд, во друштво на ѕвезди како Леонардо ДиКаприо, Бредли Купер и Натали Портман, Академијата им додели почесни Оскари и на филмската монтажерка Керол Литлтон и извршната директорка на филмскиот фестивал Санденс, Мишел Сатер.
Во богатата кариера Басет има легендарни улоги, од Тина Тарнер до кралицата на Ваканда во „Блек пантер“. На сцената таа им оддаде почит на 10-те црни актерки кои освоија Оскар – именувајќи ги секоја од нив – и рече дека се надева оти филмската индустрија ќе обезбеди повеќе можности за другите раси.
„Мојата молитва е да ја оставиме оваа индустрија побогата, со напредно размислување и поинклузивна отколку што ја најдовме“, рече 65-годишната Басет.
„На крајот на краиштата, сите ние само сакаме да имаме можност да работиме одлична, значајна работа“, додаде Басет, која има две номинации за Оскар.
Брукс ја започна кариерата како писател на скечеви за ТВ емисиите на Сид Сезар во 1950-тите пред да ги сними филмови како „Огнени седла“ и „Младиот Франкенштајн“. Доби Оскар за сценариото на филмот „Продуценти“ од 1967, кој подоцна стана хит на Бродвеј.
ИЗВОР: sdk.mk
