Предлог да се пролонгира на рокот за вадење на нови лични документи синоќа даде шефот на државата Стево Пендаровски. Тој во интервју за „Тема на денот” на телевизија Сител, говорејќи за процесот на промена на личните документи поради промената на уставното име на државата, рече дека тоа може лесно да се направи.
-Прво, тоа е срамно понижување на македонските граѓани. И непотребно. Второ, ова го предложив на најмалку двајца министри во македонската влада – со брза интервенција во два закони – закон за лична карта и закон за патни исправи, и ако е потребно и законот за безбедност во патниот сообраќај, тоа се прави во едно попладне. Знаеме дека може да се направи во едно попладне, не мора со европско знаменце да биде. Ќе ги измениме тие два закони, ќе го пролонгираме рокот, наместо февруари да биде септември-октомври, претходно ќе ги известиме и Грците дека немаме намера да бегаме од обврските од Преспанскиот договор, рече претседателот Пендаровски.
Поради промената на уставното име на државата во Северна Македонија, согласно Преспанскиот договор од 2018, рокот за промена на личните документи е до 12 февруари годинава, а на пунктовите во МВР се чека со часови и за сликање и за подигнување на на документите.
Извор: skopskoeho.mk
