Партиите во Македонија ја дигнаа „борбената готовост“. До изборите има уште бајаги, ама партијците почнаа да пукаат од сите пропагандни оружја.
Соопштенија, изјави, обвинувања, реакции, повици, апели, најави, прес-конференции, интернет спотови… со сето ова сме бомбардирани сите во земјава. Рафалите посебно се силни и долготрајни од најголемите партии. Во погон се ставени сите партиски ешалони, од раководствата, па до лепачите на плакати, од осмислувачите на прес конференции до оние кои сето тоа го соопштуваат, се чини се трага и по нови партиско-пропагандни техники… само за да се сврти вниманието на гласачите, а и да се оцрни противникот.
Практично, нема тема, нема повод за кој не се дава партиска реакција или став. Опозицијата обвинува за високата инфлација, за сомнителни набавки, нерасветлени убиства, за вината и за решенија за проблемите со пасошите, за тоа како се трошеле парите во РЕК „Битола“… Власта, пак, одговора со контраобвинувања за неспособноста на опозицијата, за нејзините блокади од кои губат граѓаните…
А сето ова е само дел од активностите, каде се тука многуте изјави на партиските и владините функционери, па објавите на социјални мрежи, па… Просто човек да се изгуби во морето на реплики и контрареплики, на соопштенија и контрасоопштенија…
Јавниот и медиумскиот простор е буквално преплавен со она што го соопштуваат најголемите партиски и коалициски групации на секои час-два се со цел да ги убедат граѓаните и гласачите дека тие се во право, дека вистината е на нивна страна и дека тие треба да си ја добијат довербата.
Ваќа ќе прават до самиот изборен ден?
А што добиваат граѓаните со тоа? Добиваат хаотична кампања која тешко се следи, а уште потешко од неа може да се добијат вистински сознанија. Добиваат задушен информативен простор, неможност да донесат објективен суд за она што е партиски став и аргумент, а што…
Да не зборуваме дека (како што тргнало) што повеќе ќе се доближува изборниот ден сето ова уште ќе се засилува, а и агресивноста на соопштенијата и настапите ќе расте…
Уште има време партиските раководства да се запрашаат дали ваквиот пропагандна борбена готовост е навистина она што им е потребно на граѓаните, а и дали сето тоа ќе донесе добро за самите партии?
Извор: skopskoeho.mk
