Наместо да патуваат до Клиниката за онкологија во Скопје пациентите со рак на дојка ќе може да ја подигнуваат таблетарната терапија од аптеките во своето место на живеење. Станува збор за лековите летрозол и анастразол кои ги употребуваат околу 2.500 пациенти.
Од фондот за здравство велат дека лековите ќе бидат достапни во аптеките за околу три недели отсега. Партиципацијата ќе изнесува од 50-100 денари.
„Пациентите нема да има потреба да одат на клиниката за онкологија, лекот ќе може да се подигнува на рецепт во аптека и од друга страна овие пациенти ќе може да одат на клиниката за онкологија само за нивни редовни консултации со онкологот кој им ја препишува терапијата и доколку има потреба бидејќи ова е долгорочна, доживотна терапија. Мислам дека е ова е и прв но значаен чекор за растеретување и на клиниката бидејќи со намалување барем за 80% на бројот на прегледи предизвикани само за издавање на овој лек ќе се ослободи простор и време за другите пациенти за кои не е возможно волку брзо да направиме промена бидејќи не примаат таблетарна форма на терапија.“ – Сашо Клековски директор на ФЗОМ.
Во меѓувреме Клековски најавува дека наскоро и клексаните ќе се најдат на позитивната листа.
„Употребата е многу поголема и ни требаше верме да обезбедиме инфомрации кои се количините кои во моментов се употребуваат во Македонија и во основа си дадовме време да видиме кој уште антикоагулантен може да се додаде на позитивината листа и сакаме со тие анализи да го пресметаме финансискиот дел.“ – вели Клековски.
Освен ова фондот денеска соопшти дека осигурениците кои имаат право на рехабилитација врз основа на контролен преглед и специјалистички извештај ќе може да ја искористат рехабилитацијата во рок од 6 месеци од денот на издавање на решението, наместо досегашните два.
Извор: 24vesti.mk
