Јасно се залагаме за итен прекин на огнот и целосно враќање на непречениот проток на хуманитарна помош во Газа и немам тешкотии да ви кажам дека ова што се случува во последните недели, во последните денови е неоправдано и неприфатливо. Израел треба веднаш да ги запре овие операции, рече грчкиот премиер Кирјакос Мицотакис во интервјуто за грчкото радио Скај, јави дописничката на МИА од Атина.
-Грција одржува стратешки сојуз со Израел и треба на нашите сојузници да им ја кажуваме вистината. Му имам кажано и директно на г-динот Нетанјаху дека ужасниот напад на 7 октомври не може да ги оправда операциите со непропорционална хуманитарна цена, рече Мицотакис.
Одговарајќи на критиките од опозицијата дека Владата избегнува да го осуди ставот на Израел, Мицотакис посочи дека владината позиција е јасна и дека земјата не молчи, туку Израел треба да ги запре операциите, за да може што поскоро да се врати снабдувањето со хуманитарна помош, храна и лекови.
-Грција воопшто не молчи по ова прашање, ако можеме да играме улога на градител на мостови, имаме намера да го сториме тоа, нагласи грчкиот премиер. (МИА)
Извор: kurir.mk
