Нема повеќе простор за идентитетски отстапки или чекори назад кога станува збор за националните определби, без разлика на цената на евроинтегративниот пат, вели премиерот Христијан Мицкоски. Според него, фокусот на Владата останува на внатрешните реформи и интеграцијата во ЕУ, при што оценува дека одамна заслужуваме да бидеме дел од тоа семејство, но поради, како што вели, булингот од една земја-членка, процесот се одолговлекува.
„Нема повеќе можност за компромиси поврзани со идентитетот, нема повеќе чекор назад кога станува збор за националните определби, без разлика колкава е цената што треба да ја платиме. Ако тоа е цената што треба да ја платиме, иако сме вистинските фаворити, тогаш оваа Влада е подготвена да ја плати таа цена и ќе чекаме подобри времиња. Ако билатералните прашања се тие што судат за нашиот европски пат, тогаш ние ќе се бориме на поинаков начин.“, вели Христијан Мицкоски.
Хрватскиот премиер Андреј Пленковиќ се изрази со поддржувачки и дипломатски тон кон евроинтегративниот пат на Македонија. Тој го стави акцентот на фактот дека уставните измени се внатрешно политичко прашање со долгорочни последици, алудирајќи дека решението треба да дојде преку политички компромис во земјата, а не само како надворешен услов.
„Очекувањата за промена на Уставот се многу важни, со долгорочни последици, сериозни чекори кои пред сè треба да бидат регулирани и решени од политичките актери. Во однос на нашиот став, во последните 25 години неправдата кон Македонија нема оправдување на евроинтегративниот пат. Го цениме ентузијазмот за членство во ЕУ и покрај сите напори и блокади кои не се благородни.“, вели Андреј Пленковиќ.
Премиерот Мицкоски истакна дека Македонија и Хрватска заедно го добиле кандидатскиот статус и првиот позитивен извештај за почеток на преговорите во 2009 година. Сепак, според него, патот на Македонија бил оттурнат, бидејќи интегративниот процес се претворил во билатерализација. Тој додаде дека билатералните прашања добиле поголемо значење од Копенхашките критериуми, што создало фрустрација кај граѓаните, бидејќи земјата верува дека одамна го заслужила своето место во ЕУ.
Извор: zurnal.mk
