ЈА КОРИСТЕШЕ ТРАУМАТА ЗА ДА ГО ПРОМЕНИ СВЕТОТ – ЅВЕЗДИТЕ СЕ ЗБОГУВААТ СО РОК КРАЛИЦАТА ТИНА ТАРНЕР

1 min read

Познатите личности и обожавателите ѝ оддадоа почит на Тина Тарнер, 83-годишната соул легенда која почина вчера. Бијонсе ја нарече „олицетворение на страста и моќта“, а ѝ се придружија и Мик Џегер и другите ѕвезди во славењето на музичкото наследство на Тарнер. Пејачката, чија смрт беше објавена вчера во Швајцарија, имаше голем број здравствени проблеми во последните години.

Физички малтретирана, емотивно разорена и финансиски уништена од нејзиниот 20-годишен брак со музичарот Ајк Тарнер со кого се разведе во 1976, таа сама си ја врати кариерата како соло пејачка и стана суперѕвезда во своите 40-ти години, во време кога повеќето нејзини врсници беа на пат надолу, и со децении остана врвна атракција со концертите.

„Како да се збогуваме со жена која ја поседуваше нејзината болка и траума и ги користеше како средство за да помогне да се промени светот?“, изјави Анџела Басет, која ја глумеше Тарнер во биографскиот филм „Што има љубовта со тоа“ (What’s Love Got to Do With It) од 1993.

„Преку нејзината храброст да ја раскаже својата приказна, нејзината посветеност да остане на патот во нејзиниот живот, без разлика на жртвата, и нејзината решеност да создаде простор во рокенролот за себе и за другите што личат на неа, Тина Тарнер им покажа на другите кои живееја во страв како треба да изгледа убава иднина исполнета со љубов, сочувство и слобода“, рече Басет.

Мараја Кери и Опра Винфри ја величаат Тарнер за надминување на долгогодишното семејно малтретирање. Семејството Обама рече дека таа „ја пееше нејзината вистина низ радост и болка“. Американскиот претседател Џо Бајден истакна дека Тарнер го започнала животот како ќерка на фармер, а се воздигна со нејзиниот „талент што се случува еднаш во генерација“.

Наречена кралица на рокенролот, Тарнер имаше глас како ураган и соодветно присуство на сцената.

Американската пејачка Глорија Гејнор рече дека Тарнер „го отворила патот за толку многу жени во рок музиката, црни и бели“. Нејзината современичка Дијана Рос рече дека е „шокирана“ и „тажна“ од смртта на Тарнер.

Мик Џегер рече дека е тажен поради смртта на неговата „прекрасна пријателка“. „Таа беше навистина енормно талентирана пејачка“, напиша фронтменот на „Ролинг стоунс“. „Таа беше инспиративна, топла, смешна и дарежлива. Таа ми помогна толку многу кога бев млад и никогаш нема да ја заборавам”, рече Џегер.

Сер Елтон Џон ја нарече Тарнер „тотална легенда на снимките и на сцената“: „Изгубивме една од највозбудливите и најелектрични пејачки … Таа беше недопирлива“.

ИЗВОР: sdk.mk

Претходно

Палестина побара од ОН да направат чекор за спречување на израелските прекршувања

Следно

САД ја одобрија продажбата на системот за воздушна одбрана за Украина во вредност од 285 милиони долари

Latest from Blog