Илјадници луѓе сместени во центри за евакуација по земјотресот во Јапонија – смртниот биланс се искачи на четворица загинати

Засега останува непознат бројот на луѓе заробени под урнатите згради во неколку градови, а целосната слика за штетите од земјотресот најверојатно ќе биде појасна утре, но евидентно е дека станува збор за големи оштетувања на инфраструктурата

Илјадници луѓе во Јапонија ноќта ја минуваат во центрите за евакуација по серијата земјотреси што денеска го погодија островот Хоншу, од кои најсилниот беше со јачина од 7,6 степени според Рихтеровата скала, јавуваат светските медиуми.  

Според јапонската новинска агенција Кјодо, смртниот биланс на загинати во земјотресот се искачи на четири лица, потврдиле локалните власти, а десетици други се повредени. 

Засега останува непознат бројот на луѓе заробени под урнатите згради во неколку градови, како последица на силниот потрес.  

Земјотресот се случи денеска околу 16 часот по локално време (7 часот според Гринич), по што беше издадено предупредување за цунами од највисоко ниво кое подоцна беше повлечено.  

По првичниот земјотрес беа регистрирани околу 60 потреси, пренесува Би-би-си.  

Целосната слика за штетите од земјотресот најверојатно ќе биде појасна утре, но евидентно е дека станува збор за големи оштетувања на инфраструктурата.

Официјални лица во градот Сузу во префектурата Ишикава соопштиле дека повеќе станбени објекти се урнати, има оштетивања на мрежата за електрична енергија, а главните автопати во близина на епицентарот на земјотресот се затворени. Повеќе од 36 000 домаќинства се останати без струја. 

Thousands of people in Japan are spending the night in evacuation centers after a powerful earthquake.
At least two people are feared dead
Dozens of buildings have collapsed in several towns, trapping an unknown number of people beneath the rubble.
BBChttps://t.co/MiuJgXA05w pic.twitter.com/I2NNsNn7Eh

— Laurentiu B . 🇪🇺 (@laurbjn) January 1, 2024

Првично, по силниот земјотрес беше издадено предупредување за цунами од највисоко ниво за крајбрежната област Ното во Ишикава, во близина на епицентарот на земјотресот, при што властите соопштија дека брановите би можеле да достигнат висина од 5 метри. 

Според извештаите на локалните медиуми кои ги пренесува британскиот национален сервис, станува збор за прво вакво известување за цунами во Јапонија од 2011 година, кога силен земјотрес кој предзвика бранови високи до 40 метри го опустоши североисточниот дел на земјата.  

Брановите кои денеска го погодија крајбрежјето на Ишикава на брегот на Јапонското Море не беа повисоки од нешто повеќе од еден метар.  

Предупредувањето од највисоко ниво подоцна беше намалено на категорија за претпазливост.  

Инаку, во состојба на готовност, беа и блиските префектури Ниигата и Тојама.  

Јапонија е една од сеизмички најактивните нации на Земјата, поради нејзината локација на таканаречениот Огнен прстен на Пацификот, каде што се среќаваат многу тектонски плочи. Постојаната закана од земјотреси ја натера Јапонија да развие еден од најсофистицираните системи за предупредување од цунами во светот. 

Во погодените области има неколку нуклеарни централи, но надлежните јапонски власти соопштија дека нема ризик од истекување на радиоактивни материи од постројките.  

Метеоролошките агенции на Јужна Кореја и на Русија, исто така, издадоа предупредувања за цунами по земјотресот. 

Земјотресот со јачина од 9 степени според Рихтеровата скала што ја погоди Јапонија во 2011 година резултираше со цунами што ги опустоши североисточните крајбрежни населени места на земјата. Во него загинаа речиси 18 000 луѓе, а десетици илјади беа раселени.  

Брановите од цунамито тогаш предизвикаа нуклеарно топење во електраната Фукушима, што беше причина за една од најтешките нуклеарни несреќи во историјата, по онаа во Чернобил во 1986 година во тогашниот Советски Сојуз, потсетува Би-би-си.