Градоначалникот на Општина Центар, Горан Герасимовски, најави кривични пријави против Јавното комунално претпријатие „Комунална хигиена“, поради како што рече – недозволивата состојба со отпадот во Скопје.
„Граѓаните плаќаат за услуга што не ја добиваат. Подготвуваме кривични пријави за повреда на законите за заштита на животната средина и бараме итни законски измени“, рече Герасимовски во емисијата „Објектив“ на МРТ.
Тој додаде дека Општина Центар секојдневно има ангажирани 110 хигиеничари, но дека тоа не е доволно ако Градот не ја извршува својата работа.
„Доколку Градот Скопје не си ја завршува својата работа и остава преполни контејнери каде што кучиња скитници го разнесуваат ѓубрето по улиците, се прави огромна штета. Ние собираме колку што можеме околу контејнерите зашто една општина нема такви возила за да може да го отстрани сметот од контејнерите, но собираме колку што можеме. Трошиме средства, време и ресурси, а дополнително сето тоа што ќе биде собрано, плаќаме за да го депонираме во Дрисла. Сето тоа ни прави огромен проблем и редно време е да се најде решение “, порача Герасимовски.
ИЗВОР: ТВ 21
