ГАЗА (АА) – Палестински официјален претставник во Газа за Анадолу изјави дека бројот на раселени што пристигнале во Рафа, во најјужниот дел на Појасот Газа, од почетокот на израелските напади на 7 октомври изнесува околу еден милион.
„Вкупниот број Палестинци во градот Рафа во моментов не е помал од 1,3 милиони, а населението на градот е околу 300.000“, рече Ахмед ал-Суфи, градоначалник на општината Рафа.
Тој истакна дека бројот во засолништата на Агенцијата на Обединетите нации, УНРВА, е околу 713.000, вклучително и раселените надвор од центрите, но регистрирани во Агенцијата на ОН.
Ал-Суфи рече дека од вкупниот број луѓе во градот на јавните плоштади и улици има околу 268.000 лица.
Од почетокот на израелската војна, стотици илјади Палестинци кои бегаат од израелските воздушни напади во градот Газа се упатија кон Рафа.
Напливот на жителите од централните подрачја на Појасот и од областа на Кан Јунис продолжува, поради предупредувањата од израелската војска за итно евакуирање.
Иако израелската војска ги класифицира областите во јужниот дел на Појасот Газа, вклучително и Рафа, како „безбедни“ зони, тие области се подложни на интензивни воздушни напади врз населени домови, што резултира со голем број жртви и повредени.
Извор: www.aa.com.tr
