ИСТАНБУЛ (АА) – Турскиот претседател Реџеп Таип Ердоган денес изјави дека Туркије ги интензивирала своите дипломатски напори за повторно воспоставување на прекинот на огнот во разурнатиот Појас Газа, јавува Анадолу.
„Ги засиливме нашите дипломатски контакти за да го вратиме прекинот на огнот, за ставање крај на прогонот и за запирање на мрежата на геноцидот“, изјави Ердоган на настан по повод празникот Невруз во Истанбул.
Тој додаде дека Туркије никогаш нема да дозволи оваа криминална структура да го претвори регионот во море од крв, алудирајќи на израелската Влада.
Ердоган исто така истакна дека Туркије го зголемила хуманитарниот ангажман за помош на жителите на Газа во пресрет на Рамазан бајрам.
Повеќе од 700 Палестинци се убиени, а над 900 ранети во ненадејната воздушна кампања на Израел врз Газа од вторникот, со што беше прекршен договорот за прекин на огнот и размена на затвореници што стапи на сила во јануари.
Убиени се речиси 50.000 Палестинци, главно жени и деца, а над 112.000 се повредени во бруталните напади на израелската војска врз Газа од октомври 2023 година.
Во ноември минатата година Меѓународниот кривичен суд издаде налози за апсење на израелскиот премиер Бенјамин Нетанјаху и неговиот поранешен министер за одбрана, Јоав Галант, за воени злосторства и злосторства против човештвото во Газа.
Израел се соочува и со случај за геноцид пред Меѓународниот суд на правдата за неговите постапки во енклавата.
Извор: Anadolu Agency (AA)
