ИСТАНБУЛ (АА) – Турскиот претседател Реџеп Таип Ердоган денес го насочи вниманието кон сѐ поголемите проблеми и притисоци во меѓународниот систем, особено во екот на континуираните израелски напади врз Газа, јавува Анадолу.
„Светската политика минува низ една од своите најостри кривини. Постои сериозен вакуум на моќта во меѓународниот систем и ние сме соочени со губење на моралот и совеста“, рече Ердоган во говорот во главниот град на Туркије, Анкара, и посочи:
„Меѓународниот систем банкротираше со кризата во Газа.“
Осврнувајќи се на нападите на Израел врз Газа, Ердоган нагласи:
„Советот за безбедност на Обединетите нации не ни трепнува пред суровоста што мора да го крене човештвото на нозе.“
Споредувајќи го израелскиот премиер Бенјамин Нетанјаху со Адолф Хитлер, Ердоган рече дека оние што „аплаудираат“ на неговите лаги „никогаш не ќе да можат да ги измијат темните дамки од рацете до крајот на нивниот живот“.
Извршителите на геноцидот „не треба да бидат зад говорниците во законодавните домови, туку во судниците каде што ќе одговараат за своите злосторства“, додаде тој.
Говорејќи за социјалните мрежи, Ердоган рече дека денес се соочуваме со „дигитален фашизам“.
„Се соочуваме со дигитален фашизам што не може да ги поднесе ни сликите на шехидите на Палестина и веднаш ги забранува продавајќи го тоа како слобода. Сведоци сме дека компаниите на социјалните мрежи се однесуваат како мафија во сите работи што навлегуваат во нивните интереси. Грижата што ја покажуваат во следењето на правилата во Америка и Европа свесно ја занемаруваат кога станува збор за Туркије“, рече Ердоган.
Извор: Anadolu Agency (AA)
