ИСТАНБУЛ (АА) – Турскиот претседател Реџеп Таип Ердоган денес изјави дека планот за преселување на Палестинците во Египет, Јордан или која било трета земја е „неприфатлив“, јавува Анадолу.
Ердоган го повтори отфрлањето на планот за раселување на Палестинците во телефонскиот разговор со францускиот претседател Емануел Макрон, соопшти Директоратот за комуникации при турското Претседателство.
Двајцата лидери разговараа и за билатералните односи, како и за регионални и глобални прашања.
За тековната руско-украинска војна, Ердоган ги нагласи континуираните напори на Туркије за ставање крај на војната и воспоставување фер и траен мир, соопшти Директоратот преку платформата X.
„Како земја која успешно ги доведе двете страни на преговарачка маса повеќепати, Туркије може да придонесе за мировните преговори, вклучително да биде и нивен домаќин“, додаде тој.
Турскиот претседател ја истакна и важноста од започнување на преговарачки процес кој не исклучува ниту една од двете земји во конфликтот.
Двајцата претседатели се согласија да работат на покоординиран начин како лидери на две земји сојузнички на НАТО, се додава во соопштението.
Извор: Anadolu Agency (AA)
