ЧУКУРОВА (АА) – Претседателот на Република Туркије, Реџеп Таип Ердоган, денеска присуствуваше на свеченото отворање на новоизградениот Меѓународен аеродром во Чукурова на југот од земјата, кој е еден од мегапроектите што Туркије ги реализира во изминатите години, јавува Анадолу.
„Овој проект ќе придонесе за развој на трговијата, туризмот и земјоделството во овој регион и ќе отвори 3.000 работни места“, рече Ердоган.
Ердоган најави дека овој аеродром во Чукурова ќе се користи за комерцијални летови, а постојниот аеродром „Шакирпаша“ ќе се користи за летови поврзани со безбедноста и борбата против катастрофи.
„Горди сме што ѝ даваме вакво дело на нашата земја, кое ќе игра улога на локомотива во развојот на целиот Медитеран“, порача Ердоган.
Станува збор за 58-от аеродром во Туркије со капацитет од девет милиони патници годишно.
Тоа ќе биде втор по големина карго центар во Туркије, а ќе служи за развојот на јужните региони, пред сѐ Адана и Мерсин.
Аеродромот во Тарсус во Чукурова е изграден на површина од 800 хектари со зграда за терминали од 110.000 квадратни метри.
Аеродромот има капацитет од 48 авиони, на кој можат да слетуваат и полетуваат авиони со најширок труп.
Меѓународниот аеродром во Чукурова се очекува да стане нова порта кон Блискиот Исток и да биде поврзан со брзата железница.
Извор: Anadolu Agency (AA)
