Комисијата за надворешни работи при Европскиот парламент усвои извештај со кој се повикува Босна и Херцеговина да спроведе итни реформи за да започне ефективни преговори за членство во ЕУ. Извештајот, усвоен со 56 гласа „за“, 13 „против“ и пет „воздржани“, ја потврдува поддршката за кандидатурата на БиХ, нагласувајќи го почитувањето на критериумите од Копенхаген, единството, суверенитетот и територијалниот интегритет на земјата.
Во Извештајот се изразува загриженост за бавниот напредок во спроведувањето на клучните реформи и ги повикува политичките лидери во БиХ да ги исполнат препораките на Европската комисија од октомври 2022 година за усвојување на преговарачката рамка. Се бараат уставни и изборни реформи, зајакнување на демократичните институции, владеењето на правото и борбата против корупцијата и организираниот криминал.
Комисијата ја осуди сепаратистичката реторика, особено од претседателот на Република Српска, Милорад Додик, предупредувајќи дека таквите политики го загрозуваат уставниот поредок на БиХ и перспективите за евроинтеграција. Се повикуваат земјите-членки на ЕУ и Европската комисија да преземат мерки, вклучително и санкции, против дестабилизирачките сили. Извештајот, исто така, ја нагласува загриженоста за надворешното влијание од Русија и Кина, особено во Република Српска, и бара подобра координација со политиките на ЕУ.
Се препорачува формирање силен преговарачки тим за БиХ, забрзување на судските реформи и финализирање на националната програма за реформи за да се обезбеди финансиска поддршка од ЕУ преку Планот за раст за Западен Балкан. Извештајот ќе биде ставен на гласање на претстојната пленарна седница на Европскиот парламент.
Извор: kurir.mk
