СКОПЈЕ (АА) – Претседателот на Собранието на Северна Македонија, Талат Џафери, по повод одбележувањето на 22 Ноември – Денот на албанската азбука, упати честитка до припадниците на албанската етничка заедница во Северна Македонија и во светот, пренесува Анадолу.
„Најсилното орудие на еден народ, унифицираната азбука со која пишуваме, читаме и ги шириме албанскиот јазик, албанската култура, обичаите, посебностите и фолклорните традиции, го започна својот пат пред точно 115 години на Битолскиот конгрес, на кој се собра интелектуалниот врв на Албанците и донесе одлука за азбуката што стана катализатор на интелектуалното, културното и уметничкото издигнување на албанскиот народ, но, над сѐ, наш идентитетски знак“, нагласи Џафери, се вели во соопштението на Собранието на Северна Македонија.
Тој рече дека тие, како одговорни политичари, имаат обврска да го чуваат и надградат тој аманет на секој чекор, со секое дело и со секоја иницијатива што ја преземаме, а младите генерации треба да ја знаат вредноста на жртвата што е направена за да се постигне да се биде на рамниште на етаблирани светски нации со цврст и неоспорен идентитет.
„Јазикот е моќна алатка што нѐ обединува помеѓу себе, а во Република Северна Македонија, како земја во која се негуваат и почитуваат сите различности, тоа е додадена вредност што обединува и луѓе и идеи, придонесува во напредокот и развојот на државата. Ви посакувам празникот да го поминете во убава и свечена атмосфера, а убавиот збор нека биде водилка во нашето секојдневје. Честит 22 Ноември – Денот на албанската азбука“, додаде Џафери во својата честитка.
