Во документот поддржан од речиси 40 научници и јавни личности од Бугарија се наведува дека доколку државата јавно и безусловно ја признае нејзината одговорност во прогонот на Евреите во Втората светска војна, тоа би било знак на зрелост и учтивост, но и заслужен поклон кон невините жртви
Четириесетина историчари, новинари, политиколози, социолози и филозофи од Бугарија ја повикаа бугарската држава јавно, искрено и безусловно да ја признае нејзината одговорност во прогонот и депортацијата на Евреите за време на Втората светска војна – нешто што, како што се вели, го направиле не само Германија, туку и земји кои поминале низ слично контроверзно минато како Франција и Романија.
Доколку и Бугарија го направи тоа, се додава во документот, тоа би било знак на зрелост и учтивост, но и заслужен поклон кон невините жртви и израз на почит кон оние кои всушност придонеле за спасување на многу човечки животи.
„На 10 март 2023 година се одбележуваат 80 години од настаните познати како ‘Спас на бугарските Евреи’. Со текот на времето, овој датум стана стана тежок со пораки и молк. Зборовите на храброст, благородност и храброст коегзистираат со агресивно негирање на соучесништво во едно мрачно дело. Нашата држава никогаш не сакаше да најде јазик со кој ќе означи два неразделни и во исто време поларно спротивни историски факти: зачуваните животи на Евреите од предвоените територии на Бугарија и депортацијата во Треблинка (4–29 март 1943 г. ) од оние од окупираните земји од април 1941 година“,
пишуваат авторите на апелот, пренесе бугарскиот портал Медиапул.
Во документот се наведува дека официјалните ставови за судбината на Евреите под бугарска власт за време на Втората светска војна систематски страдаат од, како што се вели, историски банкрот и морален недостаток.
Време е, додаваат авторите на апелот, да се фрли нов поглед на овој важен момент од историјата на Бугарија.
„Овој морален гест во никој случај не би воспоставил колективна вина на целата воена генерација, а уште помалку на следната“,
се вели во документот.
Автори на повикот во кој се бугарската држава се повикува на одговорнот за депортацијата на Евреите во Втората светска војан се економистот и историчар Румен Аврамов, историчарот Александар Везенков, историчарот Стефан Дечев, социологот Лилијана Дејанова и филозофот Стилијан Јотов.
Нивниот повик го поддржаа речиси 40 други научници, активисти за човекови права и јавни личности од Бугарија.
Извор: 360stepeni.mk
