НАПАД СО НОЖ ВО УЧИЛИШТЕ ВО ПОЛСКА: Повредени се најмалку осум лица, уапсен е 19-годишен ученик

Според
најновите податоци, најмалку седум лица се повредени – од кои две потешко – во
напад со нож во училиште во градот Остроленка во централна Полска во средата,
објави полската радиостаница RMF.

Напаѓачот,
19-годишен ученик во училиштето, побегнал по нападот, но подоцна бил уапсен од
полицијата, наведе RMF. Повеќето од повредените биле ученици, додека еден бил
наставник, се наведува во извештајот. Роберт Желински, истражувачки новинар на
информативниот портал tvn24.pl, утврдил дека 19-годишникот со нож нападнал
ученици од четврто одделение.

„Полициски
службеници од Остроленка приведоа 19-годишен маж во близина на градската плажа;
тој е осомничен дека нападнал ученици со остар предмет во близина на училиштето
и во училишниот двор во Остроленка“, соопшти полицијата на Мазовје на
платформата „X“.

Полицијата
исто така објави фотографија од приведениот маж. Според Елжбјета Лукашјевич,
портпарол на Окружното обвинителство во Остроленка, бројот на повредени лица би
можел да биде поголем. Таа изјави дека напаѓачот, Јакуб З., бил уапсен кратко
по инцидентот во областа на градската плажа.

„Младиот
човек влегол во училишната зграда со опасно оружје и нападнал ученици и
наставници. Според информациите со кои располагам, повредени се осум лица.
Повредените добиваат медицинска помош“, опиша таа. Таа додаде дека на местото
на настанот биле присутни двајца обвинители. Одделот за итна помош на
Специјалистичката болница во Остроленка (регион Мазовје) соопшти дека
повредените се згрижени во таа установа.

Повредените
биле пренесени во болница со различни средства, вклучително и со хеликоптер за
итна медицинска помош. И напаѓачот добил медицинска помош. „Според непотврдени
информации, 19-годишникот си нанел повреди и себеси“, додаде претставник на
обвинителството. Мотивот за нападот сè уште не е познат. „Дел од повредените се
наоѓаат во болницата во Ломжа, додека поголемиот дел беа пренесени во болницата
во Остроленка“, изјави за TVN24 Павел Невиадомски, градоначалникот на
Остроленка. Тој ја увери јавноста дека повредите не се опасни по живот.

Организирана
е психолошка поддршка за учениците и родителите. Се формира покраински тим за
управување со кризи.