Astronomët kanë zbuluar një kandidat të mundshëm për planet në zonën e banueshme të yllit HD 156295, i cili është ylli më i nxehtë ku është gjetur një trup i tillë deri më tani, shkruan Science Alert.
Nëse konfirmohet ekzistenca e kësaj bote gjigante, të quajtur HD 156295 b, ai do të jetë ekzoplaneti i parë i njohur në zonën e banueshme të një ylli masiv të tipit A.
Ylli HD 156295 ndodhet 140 vit-drite larg dhe është i dukshëm me sy të lirë. Ai është rreth nëntë herë më i ndritshëm se Dielli dhe temperatura e tij arrin në pothuajse 7500 gradë Celsius.
Analiza identifikoi nëntë sisteme yjore me shoqërues të mundshëm. Njëri prej tyre është HD 156295 b, një kandidat për planet që mund të jetë rreth gjashtë herë më masiv se Jupiteri. Ai ndodhet pothuajse katër njësi astronomike larg yllit të tij – katërfishi i distancës së Tokës nga Dielli – dhe e përfundon orbitën në rreth 2.200 ditë.
Për shkak të karakteristikave të sistemit, planeti merr rreth 60 për qind të rrezatimit që Toka merr nga Dielli.
Tetë kandidatët e tjerë rreth yjeve të ndryshëm supozohet se janë xhuxhë kafe, trupa qiellorë më masivë se planetët, por jo mjaftueshëm të mëdhenj për të nisur shkrirjen bërthamore. Masa e tyre e vlerësuar varion nga 25 deri në 59 herë sa masa e Jupiterit, me periudha orbitale midis 1100 dhe 2800 ditësh.
Së shpejti priten të dhëna më të sakta të mbledhura nga observatori PLATO i Agjencisë Evropiane të Hapësirës.
Burimi: botasot
