Александар Ѓорчевски – таткото на 14-годишната Вањa која беше киднапирана и убиена во декември минатата година – останува во притвор. Одлуката е донесена од Апелациониот суд Скопје откако таму вчера се одржа јавна седница на која се расправаше по барањето на одбраната на Ѓорчевски за укинување на неговиот притвор.
„Апелациониот суд Скопје, постапувајќи по предметот КСЖ-170/24, по одржана Јавна седница, на ден 22.2.2024 година, донесе решение со кое жалбата на осомничениот А.Ѓ., од Скопје, изјавена преку неговиот бранител, ја одби како неоснована и го потврди решението на Основниот кривичен суд со кое мерката притвор се продолжува за уште 30 дена“, информираа денеска од скопска Апелација.
Адвокатот Владимир Туфегџиќ, кој е правен застапник на Ѓорчевски, бараше укинување на неговиот притвор поради тоа што, како што вели, досега не е предочен ниту еден доказ од кој произлегува основано сомневање за сторено кривично дело ниту, пак, им е овозможен увид во предметот.
Минатиот месец Кривичниот суд го одби барањето на одбраната на Ѓорчевски да му биде одреден куќен притвор.
Извор: 24vesti.mk
