БЕРЛИН (АА) – Произраелскиот став на германската Влада за војната во Газа не е поддржан од јавноста, покажа новата анкета, пренесува Анадолу.
Анкетата на Институтот „Аленсбах“ покажа дека мнозинството Германци се против заземање страна во израелско-палестинскиот конфликт и силно се противат на воена поддршка за Израел.
Околу 43 отсто од анкетираните рекле дека Германија треба да остане надвор од конфликтот, а 34 отсто се изјасниле дека се согласуваат со ставот дека Германија има посебна одговорност за Израел поради неговото нацистичко минато.
Германскиот канцелар Олаф Шолц постојано изјавува дека за безбедноста на Израел не може да се преговара, а во сегашниот конфликт со Хамас, Германија „има само едно место“, а тоа е „цврсто на страната на Израел“.
Во анкетата, само 31 отсто од испитаниците го поддржаа пристапот на Шолц и рекоа дека ја поддржуваат воената кампања на Израел во Газа против Хамас.
Спротивно на тоа, 38 отсто од анкетираните рекле дека Израел треба да биде повикан да покаже воздржаност за да се спречат жртви меѓу палестинското цивилно население.
Анкетата покажа дека мнозинството Германци очекуваат Владата да заземе поизбалансиран став и да ги засили напорите за дипломатско решение на конфликтот.
57 отсто од Германците рекоа дека Владата на Шолц треба да има посредничка улога меѓу завојуваните страни.
Во меѓувреме, 17 отсто од испитаниците ја критикувале израелската Влада велејќи дека таа воопшто не сака мир.
Околу 38 отсто рекле дека Израел има „премалку разбирање за своите арапски соседи и територии кои се неоправдано окупирани“.
На прашањето за понудата на германската Влада за воена поддршка на Израел, мнозинството од испитаниците се противат на испраќањето муниција или оружје.
Околу 8 отсто од Германците рекле дека поддржуваат испраќање оружје, а само 3 отсто рекле дека германските вооружени сили Бундесвер треба да понудат поддршка на Израел во неговата воена кампања.
