„Веста дека Битолското обвинителство отворило предмет за фотографијата на заменик директорот на Македонија пат, Сашо Дранго, на која е прикажан со застрелана мечка, животно со највисок степен на заштита во Македонија, е добар чекор кон разрешница ако сакаме да се наречеме правна држава“, велат од организацијата Анима Мунди.
Тие додаваат дека, според изјавите на Дранго, тој ја инволвирал и институцијата во која работи, како и други лица кои, според нив, не треба да бидат користени како параван во оваа ситуација.
„Имајќи предвид дека во билтенот на МВР не постои податок за сообраќајна несреќа со мечка во декември, а и дека во случај на такво нешто постои строго дефинирана процедура според Законот за дивеч и ловство и Законот за заштита на животните, очекуваме брзо разгледување на реалната состојба, брзо постапување и најстрога казна“, истакнуваат од Анима Мунди.
Организацијата бара истражување дали во декември постоела пријава за убиство на мечка во надлежните институции или обвинителството и дали било сторено обид за прикривање на случајот од страна на службеници на МВР и пратеници.
Тие исто така бараат од министерот за внатрешни работи да информира дали Сашо Дранго, кој на фотографијата е во ловечка униформа и со оружје, има забрана за користење оружје и дали тоа оружје му е одземено во претходна постапка, поточно, дали снајперот кој се гледа на сликата е држан спротивно на закон.
ИЗВОР: racin.mk
