реклама
Пожарот кај Ајватовци сеуште е активен на еден крак (под репетиторите), останатите делови се изгаснати, изјави директорот на Центарот за управување со кризи (ЦУК), Стојанче Ангелов.
Нагласи дека рано утрово пожарот е ставен под контрола. Два од трите краци од пожарот кои вчера гореа, како што рече, се изгаснати.
реклама
„Екипи на скопската БППЗ работат на гаснење на активниот крак и обиколка и проверка на изгаснатите делови од пожарот. Пожарот се гаснеше непрекинато во текот на целата ноќ од страна на скопските пожарникари и доброволци од локално население предводени од градоначалникот на Општина Илинден Александар Георгиевски. Очекувам да биде целосно изгаснат во следните неколку часа. Засега нема потреба од воздухоплови.
Голема благодарност до храбрите скопски пожарникари, храбрите доброволци од локалното население кои дадоа голем придонес во гаснењето на овој голем пожар како и благодарност до храбрите пилоти на полициските хеликоптери и Ер тракторот на ДЗС“, вели Ангелов.
Пожарот избувна вчера попладне и се прошири на територијата на соседните села Мршинци, Бучинци и Бујковци во општина Илинден, како и во општина Арачиново. Во еден период беше надвор од контрола и беше најавено дека рано утринава ќе дејствуваат два полициски хеликоптера, а подоцна ќе им се приклучат и два ер трактора на Дирекцијата за заштита и спасување.
реклама
Вчера беше изгаснат пожарот во општините Пробиштип и Чешиново Облешево каде дејствуваа полициски хеликоптери и ер трактор, а во доцна попладнето заврна и дожд. Вчера вечер активни пожари имаше и во скопските села Умово и Рашче.
реклама
